مرجوج سدير و البردقوش

مرجوج سدير احد اعضاء منتدی ......... اسمعو ا قصته بلسانه:
من الايام السوداء اللي كلتها في حياتي . .. اسوق لكم هذه القصه لـ تعتبرو وتتعظو والله على ما اقول شهيد ..
متى اشوفك ياحقير ..
هذا للي مايعرفه .. دكتور اعشاب اسمه عبدالباسط السيد .. كان يجي في قناه بدايه في برنامج شكله ستار اكاديمي اسلامي .. الصراحه مدري وش اسمه بس نفس نظام ستار اكاديمي .. انا ماتابعته الا غصب .. امي غدت اخس من البزران .. ليلها ونهارها وهي تناظرهم .. المشكله مافيه شي مميز
يا يصلون .. او ياكلون .. والا ذاك الدب ابو عبدالكريم يفرم آناء الليل واطراف النهار الله يعظم اجره .. او يجيبون ذا الصعيدي يبربر ويتكلم عن الاعشاب والولد شكله خبره ..
المهم .. الرجال راح علي ثلاث شهور اتابعه وهو يمدح البردقوش .. وكل ماكلمه احد .. قال قيب ميه قرام بردقوش واشربها كل يومين مرتين .. ويعدد ويمدح ويقول انه طب نبوي .. وعلاج لاغلب الامراض وزين للشعر والمزاج والمناعه وو
طبعا انا انسان صحيّح وابو طريبه لاطفرت بالشي طفرت به اللين امل واتركه .. واسجل وصفاته كلها واطمر لـ بن منقاش والله انه بـ 300 ريال .. ماخليت شي ماشريته .. زيت كبد الحوت .. عصاره لسان الصارور .. مخ قرد معصب .. طرطشقون .. حساء الارمله الزعلانه ..
كل شي سجلته وبديت اكل وسويت جدول وكل شي في وقته .. ركزت اكثر ع البردقوش لانه يمدحه .. يقول زين للمزاج والشعر والمناعه وو ووو
المراد .. والله العظيم ياناس 4 شهور وانا مستمر عليه .. الصبح كاس والليل كاس
ماحسيت بتغير ابد .. اصلن ما ادري وش فايدته .. كل الاعشاب الثانيه وقفتها الا البردقوش
وكل مافتحت امي التلفزيون نط ذا الصعيدي بوجهي وقال
ماتنسااااااااش البردقوش يامرقوق .. واذا وقفت اعبي بنزين نتق في وجهي مع صلعته .. ماتنساااش البردقوش يامرقوق .. يالييل على ذا البردقوش ..
انا صراحه مستحيل افوت يوم من دون بردقوش .. وكل يوم اقول ابلاحظ تغيير .. ابلاحظ فرق
واشوف شعري نفسه مازاد .. مزاجي مخيس مثل العاده .. جربت اصير مايق ماركبت .. جربت اصير دلوع ماركبت .. جربت اصير رسمي ماركبت .. طاااعون ذا البردقوش وش يسوي للحين ما بانت علومه ..
وفي لحظه ما .. دخلت منتدى عن الحياه الزوجيه كـ عادتي في الارتواء بعالم النصف الاخر .. ولقيت وحده تشتكي انها مابعد حملت .. حنيّت عليها .. ودخلت موضوعها .. البنت ياعمري عمرها تشتكي من الحمل .. تقول ماخليت شي الا وسويته ولاحملت وش اسوي يابنات .. !! طبعا انا منيب بنات عشان كذا مارديت .. قلت اشوف البنات وش يقولون .. !!
شوي .. الا وحده تقول البردقوش يا اختي في الله .. انا داومت عليه شهرين وحملت ..
ايووووووه .. وش اللي حملت .. يابن اللذين يالصعيدي .. وابحث واسأل وادور في النت .. الا والله البردقوش من اهم مسببات الحمل ومنظم للدوره الشهريه للمرأه .. يخرب بيتك ياعبدالباسط .. قسم ماقال انه للحمل ابد ولاطراه .. والا لو اني سامعه ابشربه عساه الوجع ..
افااااااااا .. ذي اخرتها .. مرجوج حامل .. !!
وش اقول لامي .. طيب منهو ابوه .. !!
وجلست اتلمس جسمي .. ابي اشوف الانوثه طلعت والا .. وقسم بالله ياجماعه حسيت طلع لي صدر
حتى اني جلست اتخيل نفسي وانا خكري .. ماركبت والله ماركبت ابد
وانا اقول وراي لامريت من عند الصيدليه وشفت اولويز اتنهد .. لااله الا الله وش سويت ياعبدالباسط
فيني .. جلست اسبوع في حاله رعب .. كل مامغصني بطني قلت ذي الدوره جت .. لدرجه بغيت اسال امي وشلون البس الكوتيكس .. قلت في نفس البسها دام ربي ساتر عليك ولا اقعد اسرسب قدام الله وخلقه .. من قوه الروعه سويت بحث عن احسن دكتور يسوي اجهاض .. ولا لقيت ..
لاتلومني حسيت باحساس غريب .. اول مره اتخيل عبدالباسط ذئب بشري .. عشت في دوامه رهيبه .. يالله وشلون اقابل الناس وبطني وارم ..
والحمد لله عدا اسبوع وانا رجال .. لاحملت ولاجتني الدوره .. وسجدت لله شكرا على نعمه الرجوله
والله العظيم يا اخوان الكلام كله واقعي وحقيقي .. وموقف مريت فيه .. متى اشوفك ياقريع والله لاني لازرع البردقوش في صلعتك يانذل .